Cyrsiau ar gyfer Gweithwyr Proffesiynol

Mae'r prosiect Switch on Skills yn darparu cyrsiau a hyfforddiant achrededig ar-lein am ddim sydd â'r nod o gyflawni sero net. Mae'r prosiect, sydd wedi'i ariannu gan Gyngor Castell-nedd Port Talbot a Chronfa Ffyniant Gyffredin y DU, mewn cydweithrediad â'r byd diwydiant a'r byd academaidd, yn cyflwyno model hyblyg sy'n defnyddio datblygiadau mewn dysgu dan arweiniad ar-lein, addysgu wyneb yn wyneb a sesiynau ymarferol. Gall cyfranogwyr gael mynediad at gyrsiau byr sy'n cynnig micro-gymwysterau a defnyddio'r rhain i ennill cymwysterau ac ennill sgiliau.

Dan arweiniad Prifysgol Abertawe, mae rhaglenni arweinyddiaeth ION yn gwreiddio newid parhaol a chadarnhaol mewn arferion arweinyddiaeth, canolbwyntio ar ddod o hyd i atebion i'r heriau go iawn mae arweinwyr, ar bob lefel, yn eu hwynebu bob dydd.

Mae cyfranogwyr yn datblygu sgiliau o safon uchel â'r nod o gynyddu cynhyrchiant yn y gweithle, gan ddatblygu mentrau proffidiol a chynaliadwy sy'n cyfoethogi bywydau eu gweithwyr ac yn cael effaith gadarnhaol ar yr economi.

Cyflwynir y rhaglenni hyn gan arbenigwyr busnes, sy'n entrepreneuriaid i'r carn ac maent yn seiliedig ar ddysgu ymarferol, drwy brofiad, gyda grŵp o gymheiriaid y gellir ymddiried ynddynt.

Cychwynnodd yr Academi Deunyddiau a Gweithgynhyrchu (M2A) yn 2015 gyda'r nod o greu arweinwyr diwydiant Cymru'r dyfodol drwy ymchwil ôl-raddedig a noddir gan ddiwydiant. Mae M2A yn adeiladu ar 25 mlynedd o brofiad o ddarparu Doethuriaethau Peirianneg a dyma oedd un o'r canolfannau arloesol ar gyfer darparu cymwysterau Doethuriaethau Peirianneg. Mae M2A wedi mwyafu ar swm y cyllid sydd ar gael trwy ddefnyddio Cronfeydd Strwythurol Ewropeaidd i fanteisio i’r eithaf ar arian UKRI, gan gynnwys dwy Ganolfan Hyfforddiant Doethurol mewn Haenau Swyddogaethol yn y gweithrediad.