SUT MAE POBL YN HEDFAN
Mae'n bosib eich bod chi'n gyfarwydd â'r term "gwyddonydd rocedi" wrth gyfeirio at rywun hynod glyfar. Neu'r ymadrodd eironig “it’s not rocket science!” i nodi bod tasg yn hawdd ei chyflawni.
Yn aml cyfeirir at Beirianneg Awyrofod ar lafar fel "gwyddor rocedi", ond a bod yn hollol gywir, mae "gwyddoniaeth" yn ymwneud â deall tarddiad, natur ac ymddygiad y bydysawd, wrth i beirianneg ymwneud â defnyddio egwyddorion gwyddonol a pheirianneg i ddatrys problemau a datblygu technoleg newydd.
Mae awyrofod, neu beirianneg awyrenegol, yn ymdrin â dylunio ac adeiladu peiriannau sy'n hedfan yn atmosffer y Ddaear, megis awyrennau ag esgyll sefydlog a jetiau, gleidwyr, awtogyros, hofrenyddion a mwy.
Dyma un o'r canghennau mwyaf newydd ym maes peirianneg ac mae’n deillio o waith arloeswyr hedfanaeth yn y 19eg ganrif hwyr i ddechrau’r 20fed ganrif. Un o'r bobl bwysicaf yn hanes peirianneg awyrofod oedd Syr George Cayley, sef yr unigolyn cyntaf i wahaniaethu rhwng grymoedd codi a llusgo, sydd ar waith mewn unrhyw gerbyd sy'n hedfan.
Gellir dadlau mai'r brodyr Wright yw un o'r enwau enwocaf ym maes hedfanaeth. Yn gyffredinol fe'u cydnabyddir am ddyfeisio, adeiladu a hedfan awyren lwyddiannus gyntaf y byd. Ym 1903, llwyddon nhw i gynnal yr hediad dan reolaeth gyson cyntaf ar gyfer awyren a oedd yn drymach nag awyr. Er nad oeddent wedi adeiladu'r awyren arbrofol gyntaf erioed, y brodyr Wright oedd y rhai cyntaf i ddyfeisio rheolyddion awyrennau a alluogodd hedfan gydag esgyll sefydlog wedi'u pweru.
Roedd gwybodaeth gynnar am beirianneg awyrofod i raddau helaeth yn cynnwys gwybodaeth empiraidd, gyda rhai cysyniadau a sgiliau a fabwysiadwyd o ganghennau eraill o beirianneg. Erbyn y 18fed ganrif, roedd gwyddonwyr yn deall elfennau allweddol megis dynameg hylifau. Heddiw, mae elfennau eraill o awyrofod peirianneg yn cynnwys: gwyddor deunyddiau, thermodynameg, gyriad, strwythurau cyrff awyrennau, erodynameg, meddalwedd dylunio â chymorth cyfrifiadur a llawer mwy.
Fel peiriannwr yn y diwydiant hwn sy'n tyfu'n gyflym, gallwch ddisgwyl chwarae rôl allweddol wrth ddylunio, adeiladu, profi a chynnal a chadw ystod eang o awyrennau, gan ganolbwyntio ar agweddau amrywiol megis diogelwch wrth hedfan, effeithlonrwydd tanwydd, effaith amgylcheddol, costau gweithredu, cyfrifo amserlenni prosiectau, ysgrifennu llawlyfrau a datblygu technolegau newydd.
Mae peirianwyr awyrofod yn meddwl mewn ffordd resymegol ac ymarferol ac maent yn awyddus i ddysgu sut mae pethau'n gweithio a sut i'w gwneud nhw'n well, gan gyfrannu'n sylweddol at ein byd sy'n newid drwy'r amser.
