Ymrwymiad i Noddfa

Mae Abertawe'n croesawu Ffoaduriaid a Cheiswyr Lloches!

Yn eich cefnogi i lwyddiant:

Mae Abertawe'n adnabyddus am fod yn ddinas gynhwysol a chroesawgar a chanddi amrywiaeth helaeth o ddiwylliannau a chefndiroedd ethnig sy'n cyfrannu at ddiwylliant bywiog y ddinas. Gwelir yr un ymroddiad hwn i ddarparu amgylchedd meithringar yn y Brifysgol, gan gynnwys ffoaduriaid a cheiswyr lloches.

DINAS NODDFA

Ym mis Mai 2010, daeth Abertawe'n ail Ddinas Noddfa swyddogol y DU, gan ymuno â'r mudiad cenedlaethol sy'n ymrwymedig i feithrin diwylliant o letygarwch i'r rhai sy'n ceisio noddfa rhag rhyfel ac erledigaeth.

Yn ogystal ag annog busnesau a sefydliadau lleol i groesawu pobl sy'n ceisio noddfa i'w gweithgareddau, mae Dinas Noddfa hefyd yn cynnal y cynllun mentora, Croeso Gwell i Abertawe. Mae gwirfoddolwyr yn helpu pobl i integreiddio yn y gymuned, gan fagu hyder a lleihau unigrwydd.

Cynnig cefnogaeth Prifysgol Abertawe i Weledigaeth Dinas Noddfa Abertawe

Cynnig cefnogaeth Prifysgol Abertawe i Weledigaeth Dinas Noddfa Abertawe a'r Siarter Dinas Noddfa.

Mae Prifysgol Abertawe'n datgan yn gyhoeddus ei chefnogaeth i weledigaeth Dinas Noddfa Abertawe a'r Siarter Dinas Noddfa.Rydym yn addo gweithredu i gyfrannu at droi'r weledigaeth yn realiti a chreu lle croesawgar a diogel i'r rhai hynny sy'n ffoi trais ac erledigaeth.

Ers blynyddoedd, rydym wedi gweithio i wella profiad y rhai hynny sy'n ceisio lloches a noddfa yn ein prifysgol a'r gymuned ehangach drwy waith ein myfyrwyr a staff gwirfoddol.Mae ein cymuned ymchwil yn cyfrannu at ymchwilio a gwella profiad ffoaduriaid a cheiswyr lloches.

Rydym yn gwerthfawrogi cyfraniad y rhai hynny sy'n ceisio noddfa a byddwn yn cynnwys eu lleisiau yn ein gwaith.Byddwn yn parhau i weithio i greu cysylltiadau cryfach â sefydliadau ar draws ein cymuned drwy waith ein myfyrwyr, ein staff a'r brifysgol fel sefydliad.

Digwyddiad Croeso Noddfa

Ar ddechrau'r flwyddyn academaidd hon, gwnaethom gynnal Digwyddiad Croeso i'r holl fyfyrwyr sy'n ceisio lloches. Roedd hwn yn gyfle i fyfyrwyr newydd gwrdd ag aelodau staff a chael taith dywys o gwmpas rhannau o'r Brifysgol. Diolch i bawb a gymerodd ran.

Two students at our Sanctuary Welcome Event in 2024

Gweithgareddau sydd ar ddod

Arddangosiad y Gwasanaethau Cymorth

Dydd Iau 10 o Fis Hydref, 11am – 3pm, Campws Parc Singleton, Taliesin Create

Dydd Iau 17 o Fis Hydref 11am – 3pm, Campws y Bae, Y Twyni

Dere i Arddangosiad y Gwasanaethau Cymorth i gwrdd â staff o'r gwasanaethau hyn, cael sgyrsiau wyneb yn wyneb am dy brofiadau di, a meithrin dealltwriaeth well o'r holl ffyrdd y gall y Brifysgol dy helpu i ffynnu yn ystod dy amser yma, beth bynnag rwyt ti'n ei astudio a beth bynnag yw dy gam astudio.

Gobeithiwn fod ein holl fyfyrwyr yn teimlo'n gartrefol gyda ni yma yn Abertawe ond os oes angen cymorth personol neu academaidd arnat ti yn ystod dy astudiaethau, mae nifer o wasanaethau myfyrwyr a staff sydd ar gael i dy helpu di.

Bydd diodydd poeth ar gael, a nwyddau am ddim i gasglu o’ch gwasanaethau cymorth

Am mwy o wybodaeth: Arddangosiad y Gwasanaethau Cymorth

DYSTOPIA (2023) – Darlledu Ffilm

Dydd Mawrth 5 Tachwedd, Theatr y Grand Abertawe, 11:30am-2pm & 2pm-2:30pm

Ymunwch â ni wrth i ni ddangos DYSTOPIA (2023), ffilm sy'n canolbwyntio ar hynt a helynt ffoadur Affricanaidd yn Ewrop. Ar ôl dangos y ffilm, bydd trafodaeth banel gyda'r gwneuthurwr ffilmiau o Sbaen,Samuel Sebastian, y cyd-gyfarwyddwr a'r cyd-gynhyrchydd Dr Sergei Shubin, a chyd-drefnwyr y digwyddiad sy'n dod o gefndiroedd ffoaduriaid.

Bydd y ffilm a'r drafodaeth ganlynol yn helpu i ddyneiddio ffoaduriaid heb eu gwrthrycholi, gan helpu i ddatblygu empathi fel y meincnod ar gyfer rhyngweithio moesegol â'r bobl sydd wedi'u dadleoli. Bydd y digwyddiad yn annog cyfranogwyr i ddatblygu perthynas fwy cadarnhaol â mudwyr a dylanwadu ar eu hagwedd bersonol, wleidyddol ac adfyfyriol tuag at bobl sy’n symud.

Pynciau'r digwyddiad: Ffoadur; ceisiwr lloches; Cymru; Abertawe; dangosiad; ffilm

Math o ddigwyddiad: Gweithgaredd wyneb yn wyneb

Cynulleidfa: Ar agor i bawb

Arweinydd y Digwyddiad: Dr Sergei Shubin

Cofrestrwch yma

DPIA - Hyfforddiant Codi Ymwybyddiaeth

Dydd Mercher 20 Tachwedd, 14:00-15:30, Zoom (Ar-Lein)

Bydd y sesiwn hon yn helpu aelodau staff i ddeall y system ceisio lloches bresennol yn y DU, problemau amrywiol y mae ffoaduriaid a cheiswyr lloches yn eu hwynebu a sut gallant helpu i groesawu ac integreiddio ceiswyr lloches yn y Brifysgol ac yng Nghymru. Bydd siaradwr lloches yn y digwyddiad i drafod ei brofiad personol ac arwain trafodaethau yn y grŵp. Drwy'r sesiwn hon, rydym yn gobeithio annog unigolion i groesawu pobl yn eu cymunedau eu hunain ac annog yr egwyddor o berthyn i bawb ym Mhrifysgol Abertawe.

I gadw eich lle ar y cwrs hwn, e-bostiwch Sanctuary@abertawe.ac.uk