Blwyddyn mewn Ymchwil Gymhwysol

student scientist looking at field equipment

Beth yw Blwyddyn mewn Ymchwil Gymhwysol?

Mae'r Flwyddyn mewn Ymchwil Gymhwysol yn gyfle amhrisiadwy i fyfyrwyr ennill profiad ymarferol mewn amgylchedd ymchwil am gyfnod sy'n amrywio o 9 i 12 mis, gydag isafswm o 40 wythnos.

Yn ystod y cyfnod hwn, mae myfyrwyr yn ymgolli yng ngweithgareddau beunyddiol grŵp ymchwil, gan gymryd rhan mewn sawl prosiect a meithrin sgiliau uwch mewn methodolegau ymchwil, dadansoddi data a'r defnydd o dechnolegau perthnasol.

Mae'r profiad hwn hefyd yn cynnwys ysgrifennu adroddiadau technegol, syntheseiddio llenyddiaeth a chyfleu gwybodaeth dechnegol yn effeithiol. Mae cyfleoedd i rwydweithio a meithrin proffil proffesiynol yn rhannau annatod o'r lleoliad gwaith.

Disgwylir i fyfyrwyr feithrin dealltwriaeth feirniadol o dechnegau casglu a dadansoddi data, moeseg ymchwil a gofynion iechyd a diogelwch.

Ar ddiwedd y lleoliad gwaith, bydd myfyrwyr yn llunio portffolio manwl ac yn cyflwyno poster, sy'n cael eu hasesu ar ôl i'r myfyriwr ddychwelyd.

PAM ASTUDIO BLWYDDYN MEWN YMCHWIL GYMHWYSOL?

Mae gan ddull y Flwyddyn mewn Ymchwil Gymhwysol o ddysgu yn y gweithle lawer o fanteision i fyfyrwyr:

Gweithio'n annibynnol ac mewn grŵp ymchwil mwy i greu syniadau ymchwil a chynnal ymchwil a gwaith dadansoddi
Defnyddio caffael llenyddiaeth sy'n eich galluogi i ddeall arloesiadau a datblygiadau diweddar yn y maes perthnasol
Arddangos a datblygu pynciau ymchwil mewn maes ymchwil penodol
Trin setiau data cymhleth ac ymgymryd â gwaith dadansoddi a chyflwyno data
Cynnal arbrofion ac efallai eu dylunio
Cyfrannu at adroddiadau gwyddonol penodol mewn fformatau priodol, a'u llunio
Bydd meithrin sgiliau technegol mewn amgylchedd ymchwil yn gwella cyflogadwyedd yn y dyfodol

Mae'r rhaglen hon yn helpu i fagu hyder myfyrwyr a chadarnhau eu hawydd i ddilyn gyrfa mewn ymchwil wyddonol. Fel arall, bydd myfyrwyr yn meithrin sgiliau gwerthfawr ond yn penderfynu nad yw ymchwil yn addas iddyn nhw!

Trefnu Lleoliad Gwaith Ymchwil

Bydd angen i’r holl fyfyrwyr sy’n ymgymryd â rhaglen Blwyddyn mewn Ymchwil Gymhwysol fynd i fodiwl paratoi cyn y lleoliad gwaith, a fydd yn ymdrin ag elfennau mwy penodol ar gyrchu lleoliadau gwaith, cyflwyno cais amdanynt a’u cwblhau.

Fel arfer bydd y broses o gyflwyno cais am leoliad gwaith yn gystadleuol; dim ond y sefydliad rydych chi wedi ymgeisio iddo sy'n penderfynu recriwtio. Felly, nid oes gwarant y byddwch yn sicrhau lleoliad gwaith.

Mae’n bosibl na fydd yr holl fyfyrwyr yn llwyddiannus wrth sicrhau lleoliad gwaith; yn wir, mae’n debygol y bydd nifer cyfyngedig o leoliadau gwaith ar gael ar unrhyw adeg.

Os nad yw myfyriwr yn gallu sicrhau lleoliad gwaith, bydd yn gallu trosglwyddo'n awtomatig i fersiwn tair neu bedair blynedd ei gynllun gradd.

Meini Prawf y Lleoliad Gwaith

Er mwyn bod yn gymwys am leoliad gwaith Blwyddyn mewn Ymchwil Gymhwysol:

Hyd: Rhaid bod o leiaf 40 wythnos (amser llawn neu gyfwerth).
Lefel y gwaith:Rhaid cynnig gwaith ar lefel graddedigion neu'n agos at hynny.
Lleoliad: Yn cael ei gynnal mewn sefydliad ymchwil megis prifysgol neu sefydliad ymchwil. Caniateir partneriaethau â byd diwydiant os yw'r prif oruchwyliwr yn hanu o sefydliad ymchwil.
Cymeradwyaeth: Rhaid i'r darparwr gadarnhau lleoliadau'n ysgrifenedig a'u hanfon drwy e-bost at y Tîm Cyflogadwyedd erbyn 31 Awst ym mlwyddyn y lleoliad. Rhaid i bob parti lofnodi'r cytundeb cyn y dechrau.
Yswiriant: Rhaid i ddarparwyr lleoliadau gwaith gynnig yswiriant digonol, gan gynnwys atebolrwydd cyflogwyr ac atebolrwydd cyhoeddus, gan gwmpasu'r myfyriwr fel cyflogai.
Penderfyniad y Brifysgol: Mae'r Brifysgol yn pennu cymhwysedd am leoliadiau gwaith a gall wrthod neu derfynu lleoliadau oherwydd risg uchel neu newidiadau mewn amodau.
Yr Hawl i Weithio: Rhaid i fyfyrwyr gael hawl ddilys i weithio yng ngwlad y lleoliad gwaith, fisa ddilys os oes angen, a rhif Yswiriant Gwladol.

Lleoliadau Gwaith Rhyngwladol:

Mae'r Brifysgol yn darparu rhywfaint o yswiriant ar gyfer lleoliadau gwaith dramor. Dylai myfyrwyr gael manylion gan y Tîm Ewch yn Fyd-eang ac efallai y bydd angen trefnu yswiriant damweiniau personol ychwanegol os oes bylchau yn yswiriant y darparwr.

Nodyn: Nid yw'r Flwyddyn mewn Ymchwil Gymhwysol yn dwyn credydau, ond bydd yn cael ei chofnodi ar drawsgrifiad HEAR a'i nodi ar y dystysgrif gradd.

Ga i drosglwyddo i'r cynllun Blwyddyn mewn Ymchwil Gymhwysol?

Cewch.

Er mwyn ystyried trosglwyddo myfyrwyr i raglen Blwyddyn mewn Ymchwil Gymhwysol, mae'n rhaid iddynt fodloni'r meini prawf dilyniant priodol.

Cysylltwch â Thîm Cyflogadwyedd a Lleoliadau Gwaith y Gyfadran Gwyddoniaeth a Pheirianneg(employability-scienceengineering@abertawe.ac.uk) neu MyUniHub am ragor o wybodaeth am y meini prawf.

Beth yw'r Ffïoedd Dysgu yn ystod y Flwyddyn Ryngosod?

Ar gyfer y rhaglen Blwyddyn mewn Ymchwil Gymhwysol, bydd costau eich Ffioedd Dysgu safonol yn cael eu lleihau pro-rata ar gyfer sesiwn berthnasol y Flwyddyn Ryngosod - fel arfer, dyma'r 3edd flwyddyn o raglen 4 blynedd.

Am Flwyddyn mewn Ymchwil Gymhwysol, codir 20% o'r ffi safonol y cytunwyd arni.

Os hoffech chi ragor o wybodaeth am hyn, e-bostiwch studentfinance@abertawe.ac.uk.

Beth mae myfyrwyr blaenorol wedi'i wneud?

Bob blwyddyn byddwn yn cynnal cyflwyniad posteri lle bydd myfyrwyr yn rhoi cyflwyniadau am eu profiadau yn ystod y flwyddyn ryngosod.

Gwyliwch y fideos hyn ar Instagram i weld neu glywed ein myfyrwyr yn siarad am eu lleoliadau gwaith: