Hyrwyddo Cyfranogiad Disgyblion trwy Weithio mewn Partneriaeth
Chloe Taylor - Arweinydd Rhwydwaith AGA ar gyfer Ysgol Gynradd Dyfnant
Er 2022, fel Arweinydd Addysg Gychwynnol Athrawon (AGA) ar gyfer rhwydwaith Dyfnant, rwyf wedi cymryd rhan flaenllaw wrth ddatblygu'r Rhaglen TAR Cynradd o fewn Partneriaeth Ysgolion Prifysgol Abertawe (PYPA). Felly, roeddwn wrth fy modd i dderbyn gwahoddiad gan Russell Grigg a Helen Lewis i siarad am fy nghyfraniad yng nghynhadledd Cymdeithas Ymchwil Addysgol Prydain (BERA) a gynhaliwyd ym Manceinion (8-12 Medi, 2024).
Mae hi bob amser ychydig yn frawychus i gamu i ffwrdd o’r hyn sy’n gyfarwydd, sef rhywbeth rwyf yn ei wynebu’n ddyddiol wrth gyflwyno i ddosbarth o ddysgwyr. Roedd camu o’r ystafell ddosbarth i rannu syniadau ac arferion gyda chydweithwyr o gefndir academaidd yn fwy dieithr eto. Fodd bynnag, gyda chefnogaeth tîm y brifysgol, roeddwn yn teimlo’n barod ac fy mod yn meddu ar y gallu i gyflwyno ein deunyddiau’n hyderus yn yr amgylchedd hwn.
Yn ystod yr amser a dreuliais yn BERA, cefais y cyfle i ddysgu gan weithwyr proffesiynol a oedd yn cynrychioli darparwyr eraill. Daeth yn amlwg mai ffocws sylweddol mewn Addysg Gychwynnol Athrawon genedlaethol yw sut i annog partneriaid ysgol i gefnogi datblygiad rhaglenni. Daeth yn glir fod darparwyr prifysgolion yn treialu ffyrdd newydd o gasglu syniadau ac arbenigedd gan gydweithwyr ysgol, megis mentoriaid ac arweinwyr rhwydwaith, i wella eu deunyddiau a chyfleoedd i’r myfyrwyr y maent yn eu haddysgu.
Pan ddaeth yr amser i roi ein cyflwyniad ar ‘Hyrwyddo Cyfranogiad Disgyblion trwy Weithio mewn Partneriaeth’, roeddwn eisoes wedi treulio’r bore yn rhwydweithio gyda gweithwyr proffesiynol o ystod o ddarparwyr prifysgol o bob rhan o’r DU a thu hwnt. Roedd hi’n gysur ac yn galonogol darganfod faint o ddiddordeb oedd gan y gweithwyr proffesiynol hyn yn ymateb PYPA i addysg uwch a darpariaeth ar gyfer ysgolion a’u dysgwyr. Roedd y cyflwyniad yn canolbwyntio ar bedair ffordd yr ydym yn hyrwyddo cyfranogiad disgyblion:
- Fel ymchwilwyr sy'n cymryd rhan yn y Rhwydwaith Ymchwilwyr Addysgol Ifanc (YERN).
- Fel cyfwelwyr ar banel ar gyfer darpar fyfyrwyr TAR Cynradd (gweler Ffigur 1).
- Fel arweinwyr yn cymryd rolau arweinyddiaeth ar ddiwrnodau Arfer a Theori pan fydd athrawon dan hyfforddiant yn ymweld â'u hysgolion.
- Fel dysgwyr gydol oes trwy gymryd rhan mewn digwyddiadau prifysgol, megis cynhadledd ymchwil flynyddol Y Ganolfan Ymchwil i Ymarfer.
Ffigur 1. Mae’r disgyblion yn ysgrifennu sylwebaeth am bob ymgeisydd ac yn eu trafod gyda'r arweinydd AGA a'i gilydd.
Roedd ein cyflwyniad yn llwyddiant ysgubol. Roedd ein cydweithwyr sy’n cynrychioli addysg athrawon mewn gwahanol wledydd yn awyddus i drafod ein harferion a sut y gellid addasu’r rhain i’w lleoliadau eu hunain. Mynychwyd y cyflwyniad gan 21 o bobl, sef nifer da o ystyried rhaglen brysur BERA, neu felly maen nhw’n ei ddweud! Fi oedd yr unig gynrychiolydd ysgol a oedd yn bresennol yn y seminar a dangosodd y gynulleidfa eu gwerthfawrogiad o hyn, sy’n dyst i’r meddylfryd gwirioneddol gydweithredol yr ydym yn ei ddatblygu yn PYPA.
Chloe Taylor yn cyflwyno yn BERA
Chloe Taylor gyda’i chydgyflwynwyr Helen Lewis a Russell Grigg