BSc Peirianneg Meddalwedd Gymhwysol

Rhaglen 3 blynedd yw’r BSc mewn Peirianneg Meddalwedd Gymhwysol, sydd wedi’i rannu’n dri chyfnod o dri mis bob blwyddyn. Cynhelir darlithoedd a labordai ar y campws bob dydd Mercher rhwng 1pm ac 8pm.

Ymrwymiadau'r Cwmni

Gan fod y rhaglen hon yn cynnwys dysgu sy’n seiliedig ar waith, bydd angen i chi fod wedi eich cyflogi gan gwmni neu sefydliad sy'n eich cefnogi i ymuno â'r cwrs. Bydd angen i'ch cwmni eich rhyddhau o'ch cyflogaeth er mwyn mynychu Prifysgol Abertawe a bydd angen hefyd i chi ddarparu mentor o’r gweithle a all roi arweiniad a chefnogaeth gan y busnes.

Modiwlau a Addysgir

Mae pob cyfnod o dri mis yn cynnwys dau fodiwl a addysgir sy’n werth 15 credyd yr un. Asesir pob modiwl a addysgir gyda chyfuniad o waith labordy, gwaith cwrs a dau brawf dosbarth (Prawf Canol Tymor a Phrawf Diwedd Tymor). Y marc pasio ar gyfer pob modiwl yw 40%. Ar ddiwedd pob tri mis, bydd myfyrwyr yn cael cynnig cyfle i ail-wneud unrhyw fodiwlau a fethwyd (h.y. modiwl gyda marc o lai na 40%) o'r cyfnod tri mis presennol; bydd y marc wedi'i gapio ar 40% ar gyfer modiwlau sy’n cael eu hail-wneud. Ar ddiwedd pob tri mis, bydd yn ofynnol i unrhyw fyfyriwr sydd â methiant nas goddefir mewn unrhyw fodiwl (h.y. llai na 30% mewn unrhyw fodiwl yn y flwyddyn 1af neu’r 2il flwyddyn), neu sydd wedi cronni mwy na 30 credyd o fodiwlau a fethwyd yn ystod y flwyddyn academaidd, dynnu'n ôl o'r rhaglen.

Modiwlau Sy’n Seiliedig ar Waith

Yn ogystal â'r chwe modiwl a addysgir, cynhelir modiwl Portffolio sy’n Seiliedig ar Waith 30 credyd yn ystod y ddwy flynedd academaidd gyntaf. Modiwlau craidd yw'r rhain a rhaid eu pasio gydag o leiaf 40%. Mae pob modiwl Portffolio sy’n Seiliedig ar Waith yn cynnwys tasg sylweddol o bob un o'r modiwlau a addysgir lle mae'r wybodaeth a geir o'r modiwl a addysgir hwnnw yn cael ei rhoi ar waith yn y gweithle. Cwblheir y tasgau sy’n seiliedig ar waith yn amser y myfyrwyr eu hunain. Yn y flwyddyn derfynol, cynhelir dau fodiwl Prosiect sy’n Seiliedig ar Waith 15 credyd yn ystod y flwyddyn academaidd gyfan. Mae'r rhain hefyd yn fodiwlau craidd, ac maent yn cynrychioli manyleb prosiect meddalwedd sylweddol, a’i ddatblygu a’i gyflawni.

Crynodeb

Ceir trosolwg gweledol o strwythur y BSc mewn Peirianneg Meddalwedd Gymhwysol isod. Mae manylion penodol pob un o'r modiwlau i'w gweld ar ddiwedd Llawlyfr y Cwrs.

Fel rhaglen dysgu sy’n seiliedig ar waith, rydym yn gwerthfawrogi profiad ymgeiswyr yn ogystal â chymwysterau ffurfiol fel cymwysterau Safon Uwch. Yn ffurfiol, mae'r gofynion mynediad yr un fath â'n rhaglen BSc Peirianneg Meddalwedd (G600) draddodiadol. Fodd bynnag, rydym yn cydnabod profiad perthnasol yn achos myfyrwyr aeddfed nad oes ganddynt gymwysterau Safon Uwch na chanlyniadau academaidd cyfatebol digonol, a'r disgwyliad yw y gwneir cydnabyddiaeth o'r fath yn achos y rhan fwyaf o ymgeiswyr i'r rhaglen. Rydym yn ystyried pob ymgeisydd fesul achos. Os ydych yn ansicr neu'n meddwl nad ydych yn bodloni'r gofynion mynediad, yna cysylltwch â ni a gallwn drafod eich sefyllfa.

Rydym yn derbyn ceisiadau ar hyn o bryd ar gyfer y cwrs a fydd yn dechrau ddiwedd mis Medi. Os oes gennych ddiddordeb yn y cwrs, llenwch Ffurflen Gais BSc Peirianneg Meddalwedd Gymhwysol a’i dychwelyd.

Cysylltwch â'r tîm drwy seapprenticeship@abertawe.ac.uk gydag unrhyw ymholiadau neu i drafod y cwrs.

Y ffïoedd blynyddol ar gyfer myfyrwyr y DU/UE yw £9000 y flwyddyn. Ariennir y cwrs yn llawn, yn amodol ar gadarnhad gan CCAUC, sy'n cynnwys ffïoedd dysgu llawn y cwrs sef £27,000 (h.y. £9000 y flwyddyn fesul myfyriwr dros 3 blynedd).

Gellir cynyddu ffïoedd ar gyfer y blynyddoedd astudio dilynol, sef swm chwyddiant a bennir gan Lywodraeth Cymru. Ymgeiswyr rhyngwladol, cysylltwch â seapprenticeship@abertawe.ac.uk.

Nid yw'r ffïoedd dysgu yn cynnwys costau prynu llyfrau na deunydd ysgrifennu, argraffu, rhwymo traethawd ymchwil, na chostau llungopïo.

Nid oes unrhyw gostau ychwanegol gorfodol wedi'u pennu ar gyfer y cwrs hwn.

Os oes gennych ymholiadau neu os hoffech gael sgwrs am y cwrs, e-bostiwch seapprenticeship@abertawe.ac.uk

Gallwch hefyd gysylltu â: Casey Hopkins, Cyfarwyddwr y Rhaglen ar 01792 513742 neu Maria Moller, Swyddog Cyswllt Busnes ar 01792 606998

Ystyriwch gofrestru ar ein rhestr bostio i gael yr wybodaeth ddiweddaraf am ein cynlluniau Prentisiaethau Gradd a chyfleoedd hyfforddi eraill.

Llawlyfr y Cwrs

Dyddiadau Tymor - 2024-2025

Dyddiadau Tymor 2025/2026

Dyddiadau Tymor 2026-2027

https://www.technocamps.com/en/2021/09/01/case-study-dave-breeze/

https://www.technocamps.com/en/2021/08/09/case-study-aled-wyn-john/

https://www.technocamps.com/en/2020/04/09/case-study-rhun-llwyd/

https://www.technocamps.com/en/2020/05/01/case-study-paul-finch/

https://www.technocamps.com/en/2021/01/21/case-study-alfie-hopkin/

https://www.technocamps.com/en/2021/02/15/case-study-sarah-clarke/  

https://www.technocamps.com/en/2021/03/10/case-study-cheralyn-nadal/