Ymfudiad mawr y Serengeti, eirlysiau yn torri drwy'r pridd rhewllyd ac ŵyn bach newydd-anedig yn brefu yw rhai o'r pethau pleserus blynyddol y gall y rhai lwcus yn ein plith fod yn dyst iddyn nhw. Wrth gerdded drwy'r llyfrgell ddoe, roeddwn i'n ddigon ffodus i fod yn bresennol i'r ymgais funud olaf flynyddol i ddysgu popeth: grwpiau o fyfyrwyr wedi'u gwasgu at ei gilydd o amgylch y byrddau, yn adolygu fel lladd nadroedd i geisio cofio cymaint o wybodaeth â phosibl cyn rhuthro i neuadd arholiad a 'dadlwytho'r meddwl' i'w llyfrynnau arholiad. Fe wnaeth hyn wneud i mi feddwl: ai dyma'r ffordd orau o dreulio'r awr yn union cyn arholiad?
Mae'n bwysig cofio bod arholiadau'n tueddu i brofi eich gallu i ddangos eich dealltwriaeth o syniadau cymhleth a chofio a chymhwyso ffeithiau, fformiwlâu a damcaniaethau a ddysgwyd trwy'r tymor. Mae'n debyg y bydd eich gallu i wneud hyn yn cael ei effeithio gan eich cyflwr meddyliol, a'r cyflwr gorau i'r meddwl fod ynddo yw, yn ôl Cal Newport, hyderus a phwyllog. Y broblem gyda'r dull dadlwytho'r meddwl yw y gall gynhyrchu adrenalin a allai eich gwneud chi'n nerfus ac effeithio ar eglurder eich atebion.
