Mae ein hymchwilwyr yn defnyddio modelu cyfrifiadol newydd, y cyfleusterau arbrofol diweddaraf ac offer maes i ymchwilio i brosesau arfordirol, hydrometeoroleg, deinameg afonydd, llifogydd, a rhyngweithiadau amgylcheddol systemau ynni morol, gan gwmpasu ymchwil sylfaenol a chymhwysol.
Mae ein hymchwilwyr yn datblygu dulliau cyfrifiadol blaengar i efelychu amrywiaeth o ffenomenau ffisegol, gan gynnwys hylifau, solidau, symudiad tonnau a phroblemau aml-ffiseg. Mae'r ymchwil yn ymwneud â datblygiadau sylfaenol mewn dulliau rhifiadol, cynhyrchu rhwyllau, modelau wedi’u symleiddio (‘reduced order models’) a dysgu peirianyddol yn ogystal â'u defnydd wrth ddelio â phroblemau diwydiannol.
Mae ein hymchwilwyr yn datblygu strategaethau cyfrifiadol arloesol i efelychu ystod eang o broblemau ffisegol a chymwysiadau peirianneg sy'n cynnwys yn fras meysydd solidau, strwythurau a systemau cypledig. Mae'r prif bynciau yn cynnwys mecaneg solidau cyfrifiadol, modelu deunyddiau, mecaneg torri, cyswllt ffrithiannol, cyfryngau gronynnog, geomecaneg a rhyngweithiadau rhwng strwythur a hylif.
Rydym yn defnyddio ein cyfleusterau labordy a'n harbenigedd traws-ddisgyblaethol sylweddol i weithio mewn partneriaeth â byd diwydiant er mwyn archwilio ystod amrywiol o ddeunyddiau adeiladu newydd a chynaliadwy, gan ganolbwyntio ar ddeunyddiau carbon-isel a chynaliadwy. Mae themâu ymchwil yn cynnwys concritau carbon isel, morterau smentaidd wedi'u hactifadu gan alcali, concritau perfformiad uchel iawn, geopolymerau ac agregau wedi'u hailgylchu.
Mae isadeileddau trafnidiaeth yn cynnig sylfeini hanfodol i'n cymdeithas. Mae ein hymchwilwyr yn defnyddio technolegau arloesol i ddatblygu peirianneg trafnidiaeth
wydn a chlyfar i fynd i'r afael â'r problemau sylweddol mae'r argyfwng hinsawdd yn eu hachosi. Mae'r ymagweddau hyn yn cynnwys synhwyro clyfar hunan-bŵeredig,
technolegau sy'n gallu eu hatgyweirio eu hunain, rhwydwaith synhwyro diwifr ar gyfer monitro trafnidiaeth, dysgu peirianyddol ar sail ffiseg mewn peirianneg trafnidiaeth, a
chynaeafu ynni ar isadeileddau trafnidiaeth.
Gan weithio mewn partneriaeth ar brosiectau amlddisgyblaethol gyda busnesau, awdurdodau lleol, ysgolion, sefydliadau cymunedol a grwpiau eraill, ein nod yw darparu mewnwelediad ac arbenigedd ar sail peirianneg sifil i gynorthwyo prosiectau sydd o bwys i gymdeithas.
