Canllaw i Ddatganiadau Personol y Gyfraith

Mae ‘eiriolaeth’ yn un o’r sgiliau pwysicaf a ddylai fod gan gyfreithiwr: y gallu i gyfathrebu, cynghori a darbwyllo. Allwch chi gynnwys enghreifftiau o weithgareddau sydd wedi gwella eich sgiliau cyfathrebu? Neu ydych chi wedi gweithio gydag eraill a chynnig cyngor gwybodus?

Mae dealltwriaeth dda o ramadeg a strwythur brawddeg yn hanfodol wrth astudio’r gyfraith ac ymarfer y gyfraith yn broffesiynol. Mae eich datganiad personol yn dystiolaeth o faint o sylw rydych yn ei roi i hyn: peidiwch â thanamcangyfrif pwysigrwydd prawf-ddarllen!

Mae cyflwyno dadl wybodus – ysgrifenedig a llafar – yn sgil y byddwch yn ei datblygu ymhellach yn y brifysgol a thrwy gydol eich gyrfa gyfreithiol. Allwch chi gynnwys enghreifftiau sy’n dangos hyn? Er enghraifft, siarad yn gyhoeddus, dadlau neu lunio traethawd sy’n cynnwys pwyntiau o blaid ac yn erbyn safbwynt a chasgliadau.

Mae hyn yn cysylltu’n dda â’r pwynt uchod – i ddatblygu achos cyfreithiol argyhoeddiadol neu i symud ymlaen i arbenigo mewn maes cyfreithiol penodol – mae ymchwil effeithlon a manwl yn sgil hanfodol. Allwch chi ddangos enghreifftiau o ymchwil fel rhan o’ch cymwysterau presennol?

Mae gwirfoddoli yn y brifysgol yn ffordd wych o wella eich rhagolygon gyrfa ac ehangu eich gwybodaeth gyfreithiol. Os oes gennych enghreifftiau o wirfoddoli neu brofiad gwaith – yn y gyfraith neu feysydd eraill – cofiwch eu cynnwys ac ymhelaethu ar y sgiliau rydych chi wedi’u dysgu. Mae’n werth sylwi bod gwaith pro bono (sy’n golygu cynnig cyngor cyfreithiol am ddim) yn enghraifft gyffredin o weithgaredd a wneir gan fyfyrwyr a chyfreithwyr proffesiynol. Yn aml, bydd gwaith o’r fath yn cael ei wneud mewn Clinig y Gyfraith – lle mae myfyrwyr ac ymarferwyr proffesiynol yn cynnig cyngor cyfreithiol am ddim i’r cyhoedd, i helpu i liniaru toriadau mewn cymorth cyfreithiol a hefyd i roi rhywbeth yn ôl i’r gymuned leol.

Mae diddordeb mewn ymchwil ehangach neu faterion cyfredol yn ddymunol – ceir rhai agweddau ar y gyfraith nad ydynt wedi newid mewn 400 o flynyddoedd ond gall eraill fod wedi newid ers y mis diwethaf. Ond cofiwch: byddwch yn benodol, rhowch enw testun neu achos penodol – a byddwch yn sicr bod gennych ddiddordeb go iawn ynddo, gellir gofyn i chi roi rhagor o wybodaeth mewn cyfweliad.

Awgrym: Rydym wedi llunio rhestr o adnoddau i fyfyrwyr fynd i’r afael â nhw cyn dechrau eu hastudiaethau yn y brifysgol. Gall yr adnoddau hyn helpu gyda’r agwedd hon ar y datganiad personol, gan eich helpu i wella eich dealltwriaeth o derminoleg a meddwl y tu hwnt i’r cwricwlwm.

• Yn eich paragraff agoriadol, dylech gynnwys rhywbeth bachog, i ddenu sylw’r darllenydd: dylai adlewyrchu eich cefndir a’ch profiadau, a pham maent wedi dylanwadu ar eich dymuniad i astudio am radd yn y Gyfraith
• Gall enghreifftiau gynnwys: maes y gyfraith sydd o ddiddordeb i chi, llyfr perthnasol rydych chi wedi’i ddarllen ac a daniodd eich diddordeb, erthygl/pwnc yn y newyddion sy’n berthnasol ac sydd wedi effeithio arnoch chi’n emosiynol yn ddiweddar
• Os yw’n berthnasol, cyfeiriwch at nod gyrfa cysylltiedig (er enghraifft, gweithio fel cyfreithiwr, bargyfreithiwr neu yn y system cyfiawnder troseddol)
• Os yw’n anodd cychwyn, gadewch eich paragraff agoriadol tan y diwedd.

Awgrym: Bydd y rhan fwyaf o raddau yn y gyfraith yn ymdrin â saith elfen graidd y gyfraith, gan gynnwys Cyfraith Contract, Cyfraith Trosedd, Cyfraith Tir, Ecwiti ac Ymddiriedolaethau, Cyfraith yr UE, Cyfraith Camwedd a Chyfraith Gyhoeddus. Mae dewisiadau modiwl poblogaidd yn ein LLB yn cynnwys y gyfraith mewn perthynas â thriniaeth feddygol, hawliau dynol, y teulu, yr amgylchedd, masnach, cyflogaeth a’r cyfryngau.

• Trafodwch sut mae eich cymhwyster/ cymwysterau yn eich paratoi ar gyfer gradd yn y Gyfraith. Os ydych eisoes yn astudio’r Gyfraith, dechreuwch yma. Os nad ydych – peidiwch â phoeni, mae’r rhan fwyaf o gymwysterau’n cynnwys sgiliau sy’n addas i’w trosglwyddo i’r Gyfraith
• Byddwch yn benodol a dangoswch ddiddordeb deallusol – pa awduron / modiwlau /damcaniaethwyr / dadleuon sydd o ddiddordeb i chi? Pam gallai hyn eich helpu gyda’ch gradd yn y Gyfraith?
• Dangoswch sut rydych chi wedi darllen y tu hwnt i’r cwricwlwm

Awgrym: Rydym wedi llunio rhestr o adnoddau i fyfyrwyr fynd i’r afael â nhw cyn dechrau eu hastudiaethau yn y brifysgol. Gall yr adnoddau hyn helpu gyda’r agwedd hon ar y datganiad personol, gan eich helpu i wella eich dealltwriaeth o derminoleg a meddwl y tu hwnt i’r cwricwlwm.

• Wrth sôn am eich gweithgareddau allgyrsiol, peidiwch â’ch cyfyngu eich hun i restru eich cyflawniadau yn unig: nodwch y sgiliau gwnaethoch eu dysgu yn ystod eich profiad gwaith neu wrth wirfoddoli, esboniwch sut rydych wedi datblygu drwy fod yn rhan o dîm chwaraeon. Ceisiwch ymhelaethu ar y rhesymau pam, yn eich barn chi, mae’r gweithgareddau ychwanegol hyn yn berthnasol i astudio am radd yn y gyfraith - a chofiwch, ansawdd sy’n bwysig yma nid cyfanswm.
• Wrth sôn am eich ymdrechion i ddysgu y tu allan i’r ystafell ddosbarth – unwaith eto, rhowch fanylion ac esboniwch sut mae’r hyn rydych wedi’i ddysgu’n berthnasol i’r sgiliau sy’n angenrheidiol am radd yn y gyfraith. Dywedwch wrthym am ysgolion haf rydych chi wedi’u mynychu a’r hyn rydych wedi’i ddysgu, unrhyw ddadleuon cymeroch chi ran ynddynt, beth rydych chi wedi’i ddysgu o wylio sgyrsiau TED.
• Mae’r holl fathau hyn o weithgareddau’n dangos eich bod yn rhagweithiol – meddyliwch sut gallai hyn fod yn berthnasol i broffesiwn y gyfraith.

Awgrym: Yn ystod eich gradd, efallai yr hoffech chi fanteisio ar gyfleoedd megis cystadlaethau, ffug-gyfweliadau â chleientiaid, ffug-lysoedd barn neu ddadlau – mae pob un o’r rhain yn gofyn am ymroddiad amser ar ben eich astudiaethau.

• Dechreuwch drwy ddrafftio pwyntiau bwled, gan ddefnyddio’r canllawiau uchod. Peidiwch â phoeni am lunio brawddegau cydlynol â strwythur i ddechrau – canolbwyntiwch ar y pwyntiau hoffech eu gwneud
• Ar ôl llunio eich pwyntiau bwled, cynlluniwch eich strwythur a phenderfynwch le byddwch yn rhoi pob pwynt bwled. Byddem yn argymell y canlynol:
• Paragraff Agoriadol
• Eich Astudiaethau Presennol
• Dyheadau Gyrfa a Phrofiad Gwaith
• Cyflawniad yn y Coleg neu Ysgol/Gweithgareddau Allgyrsiol
• Diwedd
• Golygu a mireinio: cabolwch eich drafft nes ei fod yn ddarn darllenadwy, a gofynnwch am gyngor. Gallwch gael cymorth ychwanegol unrhyw bryd drwy gysylltu â’n Swyddog Recriwtio Myfyrwyr, Jess, yn l.hammett@abertawe.ac.uk