Sophia Redaelli

Pam dewisoch chi astudio eich gradd yn Abertawe?

O oedran ifanc, roedd gen i benderfyniad ac eglurder diwyro ynghylch fy llwybr academaidd a gyrfaol. Roedd gen i frwdfrydedd am y môr a chwilfrydedd diderfyn am ei ddyfnderoedd enigmatig a oedd o ddiddordeb gwirioneddol i mi. Wrth i mi edrych ar raglen astudio Abertawe, cefais i fy nghyfareddu gan ei harlwy. Gwnaeth cwrs mewn ecoleg a chadwraeth forol drofannol greu argraff go iawn arna i a chyd-fynd yn berffaith â'm diddordebau.

Beth yw eich hoff beth am eich cwrs?

Drwy gydol fy nhaith academaidd, rwyf wedi mwynhau pob agwedd ar y gwaith cwrs a'r gwaith ymarferol rydyn ni wedi ymgymryd ag ef. Fodd bynnag, mae'r gwaith maes wedi gwneud y gwahaniaeth mwyaf i mi. Yn ogystal â rhoi'r cyfle i gysylltu a chydweithredu â'm cyd-fyfyrwyr, cynigiodd y profiadau hyn ddealltwriaeth amhrisiadwy o lwybrau gyrfaol posib. Gwnaethon nhw feithrin y sgiliau angenrheidiol i'm paratoi ar gyfer y byd proffesiynol, gan fy addysgu i werthfawrogi pwysigrwydd meddwl yn fanwl ac yn feirniadol wrth ymgymryd â thasgau, a'm galluogi i lunio arolygon i ymdrin ag ymholiadau penodol. Rwy'n ystyried bod y gallu hwn i feddwl yn feirniadol ac yn adeiladol yn un o'r sgiliau pwysicaf a addysgwyd i mi gan Brifysgol Abertawe. 

Ydych chi wedi byw gartref yn ystod eich astudiaethau?

Yn ystod fy amser yn Abertawe, ces i'r cyfle i fyw ar y campws ac oddi ar y campws. Yn ystod fy mlwyddyn gyntaf, roedd byw ar y campws yn fuddiol gan iddo fy helpu i ryngweithio'n hawdd â myfyrwyr diddorol a hynod gyfeillgar. Yn ogystal, roedd yn fanteisiol byw'n agos at y llyfrgell, yn enwedig gan fy mod i'n dal yn anghyfarwydd â'r ddinas er mwyn dod ynghyd i astudio. Yn ystod fy ail flwyddyn, penderfynodd fy ffrindiau a mi rannu tŷ 20 munud i ffwrdd o’r brifysgol. Doedd y pellter ddim yn broblem gan fod sawl llwybr bws ar gael. Ar ben hynny, roedd yr olwg hardd ar y môr a'r parc yn berffaith wrth i ni gerdded i ddosbarthiadau. Yn bwysicaf oll, roedd byw gyda merched rhyngwladol o gefndiroedd diwylliannol gwahanol yn brofiad buddiol. Roedden ni i gyd yn rhannu'r profiad cyffredin o adael ein gwledydd brodorol ac ymaddasu i fywyd mewn gwlad newydd.

Beth rydych chi’n bwriadu/gobeithio ei wneud a chithau wedi graddio?

Graddiais i ym mis Gorffennaf 2023 ac ym mis Awst cefais i'r cyfle i fod yn intern tymor hir ar Brosiect y Môr Coch yn yr Aifft am dri mis. Yn ystod fy arhosiad, cefais i'r cyfle i ddysgu a thyfu'n broffesiynol, gan ddefnyddio dulliau a gweithgareddau ymchwil unigryw. Gwnaeth yr ymagwedd ymarferol hon fy ngalluogi i ddatblygu a gwella fy sgiliau mewn meysydd amrywiol o ran cadwraeth ac ymchwil. Drwy gyfranogi'n weithredol yn y prosiect, gwnes i feithrin dealltwriaeth ddyfnach o'r heriau a'r cymhlethdodau sy'n ymwneud â chadw ecosystem y Môr Coch. Gall y profiad ymarferol a feithrinwyd drwy'r interniaeth ddarparu sylfaen gadarn ar gyfer rhagor o ymchwil ac ymdrechion cadwraeth. Yn ystod fy arhosiad, ces i'r cyfle i feithrin gwybodaeth a sgiliau wrth gynnal arolygon amrywiol, gan gynnwys BioBlitz, toreithrwydd crwbanod a physgod, nodi cwrelau, CoralWatch a nodi crwbanod drwy ffotograffau.