Mewn ymdrech ar y cyd rhwng Prifysgol Abertawe a sefydliadau lleol, mae prosiect murlun trawsnewidiol wedi cyrraedd canol Abertawe. Dan arweiniad Flip the Streets mewn partneriaeth ag Evolve Swansea, mae grŵp o ddynion ifanc o Ysgol Dylan James wedi dechrau ar ymgyrch i fynd i'r afael â chasineb at fenywod a hyrwyddo natur gadarnhaol celf.
Nod y fenter yw grymuso cyfranogwyr ifanc, gan ddefnyddio arbenigedd Evolve, wrth archwilio modelau rôl cadarnhaol a negyddol mewn cymdeithas. Drwy weithdai a sesiynau tasgu syniadau, datblygodd y myfyrwyr gysyniad a fyddai'n arwain at furlun trawiadol sy'n ceisio trechu casineb at fenywod.
Yn ganolog i ddyluniad y gwaith celf oedd arwydd "STOP" mawr, a osodwyd yn strategol i ddal sylw pobl a oedd yn mynd heibio ac yn ganolbwynt i'r neges yn erbyn casineb at fenywod. Yn ogystal, mae'r murlun yn cynnwys geiriau megis "Gentleman," "Trusting," a "Loving," a ddewiswyd gan y myfyrwyr i bwysleisio pwysigrwydd modelau rôl cadarnhaol yn eu cymunedau.
Gydag arweiniad gan Fresh Creative, gwnaeth y dynion ifanc feddwl am syniadau ar gyfer y dyluniadau a hefyd gwnaethant helpu i ddod â nhw'n fyw gyda lliwiau llachar. Roedd y prosiect yn llwyfan ar gyfer cydweithredu cymunedol, gan ddod ag aelodau amrywiol ynghyd i sefyll yn erbyn casineb at fenywod a meithrin amgylchedd mwy diogel yn Abertawe.
Roedd Sandy, artist o Fresh Creative, yn hanfodol i hwyluso'r prosiect hwn, gan ddarparu deunyddiau ac arweiniad wrth feithrin mynegiant creadigol y cyfranogwyr. Roedd ymroddiad pawb a fu'n rhan o'r prosiect, gan gynnwys amynedd a charedigrwydd Sandy, yn allweddol er mwyn sicrhau llwyddiant y fenter.
Bu Ashton a Nicolas, dau gyfranogwr o Ysgol Dylan James, yn rhannu eu safbwyntiau angerddol am y prosiect, gan amlygu ei ymagwedd arloesol a'r pwysigrwydd o gael pethau gweledol sy'n denu sylw megis yr arwydd "STOP" amlwg. Roedd eu mewnwelediadau'n sail i arwyddocâd mentrau sy'n grymuso ieuenctid i fynd i'r afael â materion cymdeithasol o bwys mewn ffordd greadigol.
Mae'r prosiect yn amlygu safbwynt cadarnhaol ar gyfer trechu troseddau casineb yn y gymuned ond hefyd yn cynnig mewnwelediad gwerthfawr i fyfyrwyr sydd wedi cofrestru ar raglenni MA mewn Cyfiawnder Troseddol Cymhwysol a Throseddeg a'r MA mewn Seiberdroseddu a Therfysgaeth Prifysgol Abertawe. Mae'n nodi pwysigrwydd mentrau sy'n cynnig mannau adeiladol ar gyfer mynegiant creadigol wrth gyfleu negeseuon pwysig.
Gan edrych tua'r dyfodol, mae llwyddiant y cydweithrediad hwn yn ysbrydoli gobaith ar gyfer prosiectau'r dyfodol o dan y fenter "Flip the Streets", gan annog cyfranogiad ehangach a meithrin ymdeimlad croesawgar a chynnes ledled Abertawe.
Am ragor o wybodaeth am brosiectau tebyg, ewch i: www.swansea.ac.uk/cy/troseddeg-cymdeithaseg-polisi-cymdeithasol/prosiect-flip-the-streets/