Dod yn Barafeddyg

Mae angen i chi geisio am raglen gradd is-raddedig fel mynediad uniongyrchol neu ymuno â chyflogwr sy’n noddi gweithwyr fesul gradd gwyddor barafeddygol.

Am restr o gyrsiau wedi eu cymeradwyo, wele restr HCPC yma:  Approved programmes Paramedics | (hcpc-uk.org)

Bydd gofynion mynediad y rhan fwyaf o gyrsiau yn disgwyl i chi gael addysg gyfwerth â 3 Lefel A yn BBB. Mae llwybrau mynediad amgen ond bydd angen i chi feddu ar gymwysterau academaidd digonol i fodloni gofynion mynediad y sefydliad yr ydych yn gwneud cais amdano gan y bydd gan bob un ohonynt feini prawf sylfaenol i sicrhau llwyddiant wrth astudio ar lefel gradd.

Er mwyn dod yn Barafeddyg mae angen i chi gwblhau rhaglen gymeradwy sy'n cyflwyno BSc mewn Gwyddor Barafeddygol gan ddarparwr addysg cymeradwy. Ar hyn o bryd mae 71 o raglenni cymeradwy yn y DU.

Fel arfer bydd angen 112-120 o bwyntiau UCAS ar y rhan fwyaf o gyrsiau. Bydd y rhain fel arfer yn disgwyl o leiaf un wyddoniaeth a thystiolaeth o Saesneg a Mathemateg.

Er mwyn llwyddo, mae’n hanfodol paratoi ar gyfer y cyfweliad. Bydd paratoi ar gyfer cwestiynau tebygol, ymchwilio i swydd parafeddyg a’r sefydliad sy’n darparu’r cwrs a chael cyngor gan Barafeddygon sydd eisoes yn y swydd yn eich paratoi ar gyfer cyfweliad.

Mae cwestiynau’n aml yn ymwneud â rôl y parafeddygon, eich gwerthoedd personol a pham rydych am fod yn Barafeddyg. Efallai y bydd cwestiynau eraill ynghylch gwerthoedd craidd y GIG.

Mae'r rhan fwyaf o raddau israddedig yn 3 blynedd amser llawn. Mae rhai opsiynau ôl-raddedig gyda graddfeydd amser gwahanol.

Mae parafeddygon yn darparu gofal brys heb ei drefnu mewn amrywiaeth o leoliadau, gan amlaf yn gweithio mewn gwasanaethau ambiwlans yn ymateb i alwadau brys. Disgwylir iddynt allu asesu, nodi a thrin cyflyrau meddygol a thrawmatig mewn cleifion o bob oed.

Cewch eich hyfforddi i yrru'r hyn sydd mewn gwirionedd yn glinig brys symudol ac i ddadebru a/neu sefydlogi cleifion gan ddefnyddio technegau, offer a chyffuriau soffistigedig ar gyfer ystod o gyflyrau.

Byddwch hefyd yn aml yn gweithio ochr yn ochr â'r heddlu a'r gwasanaethau tân ac achub.

Byddwch yn gweithio'n agos gyda thimau gofal iechyd eraill yn y gymuned, megis meddygon teulu, therapyddion galwedigaethol, timau iechyd meddwl, arbenigwyr diabetes, meddygon a nyrsys mewn adrannau brys ysbytai.

Mae'r rôl yn hynod amrywiol ac mae galw mawr am y set sgiliau sy'n golygu bod Parafeddygon yn gweithio fwyfwy mewn lleoliadau amgen megis ysbytai, meddygfeydd meddygon teulu, canolfannau galwadau ac yn y sector preifat.

Mae cyfle i ddatblygu mewn gyrfa ac mae Parafeddygon bellach yn gweithio mewn nifer o wahanol feysydd gofal iechyd yn y sectorau cyhoeddus a phreifat gan ddarparu llawer o amrywiaeth. Dyma rai enghreifftiau lle gallai Parafeddygon weithio.

• Parafeddyg Ambiwlans y GIG
• Gofal Sylfaenol ac Eilaidd y GIG (canolfannau gofal brys, lleoliadau iechyd meddwl a chymunedol, er enghraifft)
• Ymddiriedolaethau Acíwt y GIG (rolau Adrannau Achosion Brys, er enghraifft)
• Parafeddyg Ambiwlans y Sector Preifat
• Digwyddiadau Sector Preifat
• Systemau brysbennu dros y ffôn (gan gynnwys GIG 111)
• Meddygfeydd
• Gwasanaethau GIG Cenedlaethol, gan gynnwys GIG Lloegr, Health Education England, GIG Digidol
• Awdurdod Lleol
• Addysg Uwch
• Milwrol
• Ar y Môr ac o Bell
• Gwasanaethau Meddygol Brys Hofrennydd
• Timau Ymateb i Ardaloedd Peryglus
• Timau Ymateb Gweithrediadau Arbennig
• Gwasanaethau Rhyngwladol

Mae bod yn Barafeddyg yn sicr yn yrfa heriol. Byddwch yn agored i drawma dirprwyol, sefyllfaoedd hynod emosiynol a lefelau straen uchel yn feunyddiol. Bydd angen i chi fod yn emosiynol gryf ac yn feddyliol a bod ag iechyd corfforol a hunanymwybyddiaeth dda i sicrhau eich bod yn cadw'n iach. Bydd parafeddygon yn gweithio patrymau sifft sy’n aml yn cwmpasu 24 awr 365 diwrnod y flwyddyn, mae hyn yn cael effaith a gall fod yn anodd cynnal ffordd iach o fyw. Mae parafeddygon mewn mwy o berygl na’r boblogaeth gyffredinol o anafiadau iechyd meddwl yn ogystal ag anafiadau corfforol a salwch.

Gall bod yn Barafeddyg roi boddhad mawr. Mae parafeddygon mewn sefyllfa gymharol unigryw y disgwylir iddynt weithio mewn modd ymreolaethol o'r pwynt cofrestru, golyga hyn bod pwyslais cryf ar ddatblygiad personol a dysgu parhaus.

Y cyflog cychwynnol i Barafeddyg y GIG yw oddeutu £27,000, gan godi fel arfer i £34,000 o fewn dwy flynedd. Ar ôl 7 mlynedd fel Parafeddyg gallai cyflog fod yn £40,000.

Mae'r enillion hyn yn yr ystod gyfartalog o'u cymharu â swyddi eraill, ond mae'n debyg nad arian yw'r prif reswm pam mae pobl yn dod yn barafeddygon. Mae'n fwy tebygol mai'r cyfle i helpu pobl mewn angen sy'n bwysig i unigolion.

Oherwydd amrywiaeth y swyddi a ffocws ar ymreolaeth o fewn gofal heb ei drefnu, mae set sgiliau Parafeddyg yn un sydd wir ei angen ac yn darparu nifer o gyfleoedd ar gyfer datblygu gyrfa. Awgryma Coleg y Parafeddygon bod pedwar prif barth o ddatblygiad gyrfa a elwir yn ‘The Pillars of Paramedic Practice’. Mae’r rhain yn glinigol, rheolaeth, addysg ac ymchwil.

Mae gwladolion Gwyddelig yn gymwys ar gyfer Bwrsariaeth y GIG. Mae hyn yn cynnwys myfyrwyr o Ogledd Iwerddon a Gweriniaeth Iwerddon (drwy'r trefniant Ardal Deithio Gyffredin). Dysgwch fwy am wneud cais i Brifysgol Abertawe fel myfyriwr Gwyddelig a Bwrsariaeth GIG Cymru Irish Student Guidance FAQ Complete PDF.

Mae ffioedd is-raddedig yn berthnasol. Er hynny, mewn rhai meysydd, mae gwahanol lefelau o ariannu a nawdd ar gael. Caiff rhai cyrsiau eu noddi’n llawn gan gyflogwyr neu gynlluniau’r llywodraeth.