Dod yn Therapydd Galwedigaethol

Bydd Therapydd Galwedigaethol yn gweithio gyda phobl sy'n cael anawsterau wrth gwblhau gweithgareddau o ddydd i ddydd neu mae angen cymorth arnynt i ymgymryd neu ailymgymryd â gweithgareddau bob dydd. Gallai hyn fod oherwydd anabledd, salwch, anfantais gymdeithasol, trawma neu heneiddio.

Mae therapyddion galwedigaethol yn cefnogi pobl i ddefnyddio gwasanaethau drwy eu helpu i oresgyn heriau sy'n gwneud gweithgareddau o ddydd i ddydd yn anodd o ran mynediad neu eu cwblhau. Maent yn helpu pobl i fod mor annibynnol â phosib drwy eu helpu i ddysgu ffyrdd newydd o wneud pethau, i ymgymryd â gweithgareddau a allai fod yn anghyfarwydd iddynt, gwneud addasiadau i’w hamgylchedd a chyflwyno cyfarpar defnyddiol a thechnolegau cynorthwyol lle bo angen.

Mae Therapydd Galwedigaethol yn gweithio i wella bywydau, annibyniaeth, lles ac ymgysylltiad galwedigaethol unigolion, grwpiau a chymunedau. Gallant weithio gyda phobl o bob oedran sydd wedi profi salwch, anfantais gymdeithasol, problemau iechyd meddwl neu anableddau dysgu.  Mae'r gwaith maent yn ei wneud yn amrywiol iawn, o gefnogi pobl yn yr ysbyty gyda gweithgareddau bywyd bob dydd megis: Ailddysgu sut i wisgo ac ymolchi wedi strôc; Helpu pobl ag anableddau dysgu i ddefnyddio cyfleusterau cymunedol megis cludiant cyhoeddus yn annibynnol am y tro cyntaf; Helpu pobl mewn lleoliad iechyd meddwl i fagu’r hyder a’r sgiliau i fynd yn ôl i’r gwaith; Helpu plant ag anableddau i ymgysylltu yn yr ysgol drwy addasu’r amgylchedd i gyd-fynd â’u hanghenion.  Gall therapyddion galwedigaethol weithio gyda phobl yn eu cartrefi, mewn ysbytai, carchardai, ysgolion neu yn y gymuned.

Mae bod yn Therapydd Galwedigaethol yn y DU yn gofyn am o leiaf gymhwyster BSc (Anrhydedd). Gallwch ddysgu rhagor am gynnwys y cwrs a sut y cewch eich addysgu ar ein tudalen Cwrs BSc Therapi Galwedigaethol (Anrhydedd).

Mae Therapydd Galwedigaethol yn swydd Band 5 yn y GIG, gyda chyflog cychwynnol o £28,834 sy’n codi i £35,099. Bydd Therapydd Galwedigaethol arbenigol a phrofiadol yn symud ymlaen i Fand 6 gyda chyflog cychwynnol o £35,922 a gall Therapyddion Galwedigaethol uwch a hynod arbenigol gael eu cyflogi mewn swydd Band 7 yn y GIG (£44,398-£50,807).*

 *Roedd yr holl raddfeydd talu’n gywir ar adeg cyhoeddi ym mis Chwefror 2024

Nid yw Therapydd Galwedigaethol yn Feddyg. Gweithwyr iechyd proffesiynol cysylltiedig yw Therapyddion Galwedigaethol, ac mae swydd Therapydd Galwedigaethol yn wahanol i swydd Meddyg, gyda hyfforddiant gwahanol. Maent yn gallu gweithio mewn lleoliad iechyd, yn aml yn y gymuned neu ym maes gofal cymdeithasol, ond nid o reidrwydd.

Rydym ni’n cynnig cwrs Meddygaeth i Raddedigion ar wahân i bobl â gradd sydd am fod yn Feddygon.

Mae Ffisiotherapyddion a Therapyddion Galwedigaethol yn rhannu gwaith mewn rhai lleoliadau, yn enwedig mewn ysbytai a lleoliadau iechyd, ac mae ffisiotherapyddion a therapyddion galwedigaethol yn gweithio ar y cyd i helpu pobl i reoli anableddau wrth ad-sefydlu neu adfer o broblemau iechyd corfforol.  Yn y lleoliadau hyn, gall gweithwyr proffesiynol weithio i wella swyddogaeth ac ansawdd bywyd cyffredinol y person maent yn gweithio gydag ef/hi, drwy eu helpu i gynnal neu wella eu hiechyd a’u lles.  Mae therapyddion galwedigaethol yn gweithio gyda phobl â phroblemau iechyd meddwl neu yn y gymuned, megis sefydliadau gwirfoddol, yn fwy na ffisiotherapyddion.

Y prif wahaniaeth rhwng y ddau broffesiwn pan fyddant yn gweithio ar y cyd yw bydd Therapydd Galwedigaethol yn canolbwyntio’n fwy ar hwyluso ymgysylltiad diogel ac effeithiol mewn gweithgareddau o ddydd i ddydd. Maent yn hyrwyddo annibyniaeth ac yn cefnogi pobl sy’n defnyddio gwasanaethau a’u gofalwyr mewn unrhyw bontio neu heriau byddant yn eu hwynebu.