Swyddog Ymchwil Ôl-ddoethurol

Y Brifysgol

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae cymuned y Brifysgol yn ffynnu ar archwilio a darganfod ac mae'n cynnig y cydbwysedd cywir o addysgu ac ymchwil rhagorol i gyd-fynd ag ansawdd bywyd ardderchog.

Mae ein campysau glan môr a'n cymuned amlddiwylliannol yn gwneud y Brifysgol yn weithle dymunol i gydweithwyr o bedwar ban byd. Mae ein cydnabyddiaeth a'n buddion, a'n ffyrdd o weithio, yn galluogi i bobl sy'n ymuno â ni i gael gyrfaoedd gwobrwyol, ar y cyd â chydbwysedd gwaith-bywyd rhagorol.

Y rôl

Mae'r Adran yn edrych am Swyddog Ymchwil Ôl-ddoethurol ym maes Mecaneg Solidau Cyfrifiadol gyda ffocws ar fframweithiau cyfrifiadol ar gyfer strwythurau main a wnaed o ddeunyddiau amlswyddogaethol meddal megis polymerau magneto-actif

Rôl y Swyddog Ymchwil yw gweithio ar Fecaneg Solidau Cyfrifiadol yn enwedig wrth ddatblygu algorithmau cyfrifiadol ar gyfer strwythurau tenau a main (e.e pelydrau, rhodenni, cregyn) a wnaed o bolymerau magneto-actif (MAPs). Bydd yr ymgeisydd llwyddiannus yn gweithio ar y prosiect a ariennir gan yr EPSRC, MAPFSI, gan ganolbwyntio ar ddatblygu algorithmau cyfrifiadol a ddilysir drwy arbrofion ar gyfer problemau rhyngweithio hylif-strwythur gan gynnwys ystyried effaith amlffiseg ar electromagneteg. Serch hynny, bydd yr ymchwilydd yn gweithredu algorithmau sefydledig o lenyddiaeth ar fecaneg cyswllt cyfrifiadol i ddatblygu algorithmau cyswllt ar gyfer gwrthdrawiadau MAPs gyda waliau'r siambrau hylif yn ogystal â chanfod hunangyswllt MAPs. Er mai prosiect rhyngddisgyblaethol yw hwn lle mae fframweithiau cyfrifiadol ar gyfer Mecaneg Solidau a Mecaneg Hylifau'n uno, disgwylir i'r Swyddog Ymchwil gynnal gwaith ymchwil annibynnol a datblygu methodolegau cyfrifiadol newydd a meddalwedd cysylltiedig ar gyfer ochr Mecaneg Solidau'r prosiect dan arweiniad y Prif Ymchwilwyr a chydweithredwyr eraill ar y prosiect.  Yn ogystal, bydd yr ymchwilydd yn gweithio'n agos gyda chydweithwyr a fydd yn gweithio'n bennaf ar astudiaeth arbrofol MAPs sy'n canolbwyntio'n bennaf ar feysydd rhyngweithio rhwng hylif-strwythur.

Mae tîm arwain y prosiect yn cynnwys Dr Mokarram Hossain a'r Athro Djordje Peric ym Mhrifysgol Abertawe a Dr Chennakesava Kadapa a'r Athro Emma Hart o Brifysgol Napier Caeredin. Caiff y tîm ei gefnogi'n gryf gan bartneriaid academaidd o Sefydliad Technoleg Massachusetts (MIT) a Phrifysgol A&M Texas (TAMU) yn yr UD a Phrifysgol Charles III Madrid (U3CM) yn Sbaen, a'r partner diwydiannol, Rubberatkins o'r DU. Bydd y Swyddog Ymchwil yn cael cyfleoedd i ymweld â phartneriaid academaidd a diwydiannol ar gyfer gweithgareddau cyfnewid gwybodaeth byrdymor.

Cydraddoldeb, Amrywiaeth a Chynhwysiant

Mae'r Brifysgol yn ymrwymedig i gefnogi a hyrwyddo cydraddoldeb ac amrywiaeth yn ei holl arferion a gweithgareddau. Rydym yn ymdrechu i greu amgylchedd cynhwysol a chroesawn geisiadau gan ymgeiswyr amrywiol o'r grwpiau nodweddion gwarchodedig canlynol: oedran, anabledd, ailbennu rhywedd, priodas a phartneriaeth sifil, beichiogrwydd a mamolaeth, hil (gan gynnwys lliw croen, cenedligrwydd, tarddiad ethnig a chenedlaethol), crefydd a chred, rhyw, tueddfryd rhywiol.

Sgiliau Cymraeg

Lefel y sgiliau Cymraeg sydd ei hangen ar gyfer y rôl hon yw Lefel 1 - Ychydig. Bydd deiliad y swydd yn gallu ynganu geiriau Cymraeg, ateb y ffôn yn Gymraeg, a defnyddio geiriau ac ymadroddion sylfaenol bob dydd (diolch, os gwelwch yn dda). Gellir cyrraedd lefel 1 o gwblhau cwrs hyfforddi un awr.

Mae’r Brifysgol yn sefydliad dwyieithog balch, ac mae Strategaeth Gymraeg y Brifysgol yn amlinellu ein dyheadau i hyrwyddo’r iaith a galluogi ein staff i ddod i gyswllt â’r iaith fel sgil ychwanegol yn y gweithle ac fel porth i gyfleoedd diwylliannol a chymdeithasol newydd. Croesewir ceisiadau yn y Gymraeg ac ni chaiff cais a gyflwynir yn y Gymraeg ei drin yn llai ffafriol na chais a gyflwynir yn Saesneg. Mae gan siaradwyr Cymraeg yr hawl i gael cyfweliad yn Gymraeg. Disgwylir i ymgeiswyr ar gyfer rôl lle mae sgiliau Cymraeg yn hanfodol gyflwyno’u cais yn Gymraeg, a bydd y cyfweliad yn Gymraeg, os byddwch yn cyrraedd y rhestr fer.

Gwybodaeth Ychwanegol

Gallwch gyflwyno CV a llythyr eglurhaol ar gyfer y swydd hon.

Rhannu Lawrlwytho Disgrifiad swydd Argraffu'r dudalen hon Yn ôl at y rhestr