Cydweithio yn yr Academi Iechyd a Llesiant

Sgan uwchsain o'r galon yw ecocardiogram trawsthorasig (a elwir yn aml yn eco). Mae'n brawf di-boen nad yw'n achosi unrhyw risg i blant, oedolion na babanod heb eu geni - nid yw'n cynnwys pelydrau-x.

Mae eich meddyg wedi gofyn am y prawf oherwydd ei fod yn rhoi gwybodaeth am strwythur a swyddogaeth eich calon. Mae'r wybodaeth hon yn helpu'r meddyg i ddeall achosion posibl unrhyw symptomau y gallech fod wedi'u profi fel prinder anadl neu grychguriadau'r galon. Nid yw eco yn cael ei ddefnyddio i gadarnhau abnormaleddau yn unig, gellir ei ddefnyddio hefyd i ddiystyru mathau penodol o glefyd y galon. Mae rhai mathau o glefyd y galon nad ydynt yn ymddangos ar eco a gallai fod angen profion eraill i gadarnhau nad oes unrhyw abnormaleddau. Ar hyn o bryd, mae’r prawf hwn ar gael i bobl sy'n cael eu cyfeirio gan eu meddyg teulu drwy Fwrdd Iechyd Prifysgol Abertawe Bro Morgannwg.

Mae'r GIG yn gweithio ar lefel sy'n agos at fod yn llawn ond mae'r galw am rai profion a gwasanaethau’n parhau i gynyddu. Mae'r brifysgol yn gweithio gyda'r ysbytai lleol a meddygon teulu i ddod o hyd i ffyrdd newydd a mwy effeithiol o ddarparu gwasanaethau. Rydym am weithio gyda'n gilydd i sicrhau y gall pawb gael profion o ansawdd uchel yn gynt oherwydd mae hyn yn golygu y gellir dechrau triniaeth yn gyflymach pan fydd ei hangen. Credwn y dylai gwasanaethau ysbyty flaenoriaethu pobl sy'n ddifrifol sâl neu y gwyddys bod ganddynt glefyd y galon tra bod pobl sy'n gymharol dda ond sydd angen profion i wahardd clefyd y galon yn cael eu gweld mewn amgylchedd y tu allan i'r ysbyty. Mae'r brifysgol yn ddarparwr delfrydol o wasanaethau o'r fath. Mae ein lleoliad canolog yn Abertawe sydd â chysylltiadau trafnidiaeth gyhoeddus ardderchog yn golygu ein bod yn hawdd i bobl eu cyrraedd. Mae gennym staff sy'n arbenigo yn eu maes, amgylchedd clinig o ansawdd uchel gyda'r un cyfarpar uwchsain â'r ysbytai lleol ac rydym eisoes yn gweithio'n agos gyda'r ysbytai i gynnal ymchwil ac addysgu myfyrwyr gofal iechyd ac ymarferwyr cymwys. Ni fydd yn rhaid i chi dalu am y prawf hwn, caiff y costau eu talu gan y GIG.

Nid oes angen i chi newid eich trefn ddyddiol i baratoi ar gyfer y prawf ond byddai'n ddefnyddiol pe gallech ddewis dillad sy'n eich galluogi i ddadwisgo o'r canol (cewch gynnig gŵn i'w wisgo yn ystod y prawf). Cysylltwch â ni os hoffech gael cymorth ymarferol yn ystod eich ymweliad neu os hoffech fwy o wybodaeth. Os penderfynwch beidio â chael y prawf, rhowch wybod i ni fel y gallwn gynnig yr apwyntiad i rywun arall.

Gall yr apwyntiad gymryd hyd at 45 munud a chaiff ei arwain gan wyddonydd gofal iechyd mewn ystafell breifat. Os dymunwch, gallwch ddod ag un ffrind neu berthynas i mewn i'r ystafell gyda chi.
Bydd yr apwyntiad yn dechrau gydag ymgynghoriad byr i sicrhau eich bod yn deall pam rydych chi'n cael y prawf, beth fydd yn digwydd yn ystod y prawf a phryd y byddwch yn derbyn y canlyniadau. Byddwch bob amser yn cael cyfle i ofyn cwestiynau a thrafod unrhyw bryderon.
Gofynnir i chi lofnodi ffurflen ganiatâd sy'n cadarnhau eich bod yn hapus i gael y prawf. Gofynnwn am fesur eich taldra, pwysau a phwysedd gwaed ar ddechrau'r prawf oherwydd bod y rhain yn berthnasol i faint a swyddogaeth eich calon. Yn ystod y prawf byddwn yn cofnodi rhythm eich calon ac yn cael lluniau o'r galon trwy symud stiliwr bach wedi'i orchuddio â gel dyfrllyd dros eich brest.
Gofynnir i chi orwedd ar eich ochr chwith gyda'ch braich wedi'i chodi gan fod hyn yn helpu i gael lluniau gwell ond gallwch barhau i gael y prawf hyd yn oed os na allwch orwedd yn y sefyllfa hon. Mae angen i ni hyfforddi myfyrwyr gwyddonol gofal iechyd sut i gyflawni'r prawf, felly mae'n bosibl y bydd rhywun ychwanegol yn yr ystafell yn ystod eich apwyntiad.
Cysylltwch gyda ni o flaen llaw’r apwyntiad os nad ydych yn dymuno cael myfyriwr yn yr ystafell yn ystod eich apwyntiad.

Ar ôl y prawf, bydd y gwyddonydd gofal iechyd yn adolygu'r lluniau ac yn anfon adroddiad o'r canfyddiadau at y meddyg a ofynnodd am y prawf. Caiff y lluniau eu storio'n electronig fel y gellir eu hadolygu gan arbenigwr os oes angen. Efallai y cewch gyngor cyffredinol gan y gwyddonydd gofal iechyd yn ystod yr apwyntiad, ond dim ond eich meddyg all drafod canlyniadau'r prawf gyda chi yn fanwl a phenderfynu a oes angen unrhyw brofion neu driniaeth bellach arnoch.

Mae gan Sefydliad Prydeinig y Galon ystod o daflenni gwybodaeth efallai y byddwch yn eu darganfod yn ddefnyddiol. Medrwch eu gweld yma https://www.bhf.org.uk/publications.